Nan dat 20 septanm chak ane, Ayiti leve kanpe pou salye memwa yon gwo potorik gason , yon fason kanson, yon revolisyonè ki te pote nasyon an sou zepòl li: Jean Jacques Dessalines, papa nasyon an. Li pat sèlman yon stratèj militè men yon vizyonè ki te wè Ayiti lib pandan tout lòt moun te kwè li enposib.
Thank you for reading this post, don't forget to subscribe!Nan lanne 1804, Dessalines te mete fen nan esklavaj e te fè Ayiti vin premye peyi nwa ki pran endepandans epi premye anpi nan Amerik la. Konviksyon li, kouraj li, e detèminasyon li pou libere pèp la kont opresyon fè l tounen yon senbòl tout moun kap goumen pou libète. Se avèk linyon, Dessalines te rele Ayisyen yo “pitit ginen” pou yo sonje rasin yo, e li te mete yon nasyon ki se baz fyète nou jodi a.
Dessalines te konprann ke libète pa ka vann, ke dwa pou egziste kòm moun egal-ego te dwe retounen nan men pèp li. Se pa t yon libète an papye sèlman, men yon libète ki te akonpaye ak jistis sosyal, kote tout moun ta dwe jwenn respè, dinyite, ak chans yo pou yo viv kòm moun.
Jodia, pandan nou selebre Dessalines, ann mande tèt nou si nou vrèman ap suiv chemen li te trase a. Èske n ap kontinye ak vizyon li pou yon Ayiti lib, egal, e jis? Fèt Dessalines pa sèlman yon moman pou selebre, men yon apèl pou nou reviv ideyal li yo, pou nou met tèt ansanm kont tout fòm enjistis ak opresyon ki kontinye kraze nasyon an.
Onè ak respè pou Jean Jacques Dessalines, Papa Nasyon nou an! Yon limyè te pran nesans nan lane 1758 , li ret limen etènèlman kòm senbòl libète ak fyète pou tout yon ras. Ayibobo! Tout glwa pou Dessalines.
Jean-Pierre Styve
Rédacteur en chef adjoint (RCA)
Bacc en Administration scolaire
Enseignant
